تمت بحمد الله(............)؟؟

خلصنا الفستان ياريت تيجوا تستلموه ولا ليه احنا عندنا توصيل للمنازل ومش لازم تتعبوا نفسكم فى بروفة ولاغيره اسم الموديل (الست عدلات السورية )

فزورة حزورة

عزيزى الموطن المحروم فى ارضه المجروح فى عرضه المقتول له ولده المنكوب

المنكوس بحكومته

عندى لك فزورة صغنونة بس للاسف مالهش جايزة الا دعوة ولية ساعة مغربية

1اختر من الشخصيات التلاتة من سوف يعدم شنقا لانه وحش ومش نضيف وبيلعب فى الشارع؟؟؟؟

2مين الى عنده كاريزما وخللى الملكة اليزابيث تصر انه لازم يريح اعصابه من دوشة الشغل؟؟

3مين اللى يستاهل لانه هو سبب الفقر والبطالة والفساد والتلوث فياريت يموت ويخلص النظام؟؟

وعشان أنت غلبان ومش ناقص حاادعيلك من غير جايزة

(........................................) قول أمين

خرابيش

خربوشة خربشتنى خلت اوراقى مدندشة

خربوشة خربشتنى بقت أيامى مفرفشة

خربوشة خربشتنى بقت أحلامى منعنشة

خربوشة ورا خربوشة ورا خربوشة ورا خربوشة هوووووووب

خربوشة فوائتنى صحيت لقيت الدنيا ملبشة

سلام على الاخضرا

بعد السلام والتحية على ألامة العربية وكمان سلام للقومية وعسل القومية ياسادة ياكرام سمعنا سمع خير انشالله؟؟ ان حبيبنا وجارنا فى الخير والشر مش عاجبه اللى بيحصل فى افريقيا اليومين دول।
أما اللى بيحصل ياسادة والاخ مش شايف ان ليه عازة .... حاجة قبيحة وميصحش الوطن العربى البرىْ يخدش حيائه بمعرفتها ؟ أتارى فيه دول عربيه بتعرف حاجة اسمها انتخابات حقيقية لاو
أيه رئيس دولة يتنازل قبل الانتخابات زى ماوعد (شوف ازاى) وكل ده حصل فى موريتنيا
والاخ العقيد بيقول ان الانتخابات مجرد مهرجانات العاب واى كلام طب ياريت تبقى عندنا وعندكم قول انشالله العاب ومهرجانات احسن الواحد بقالوا 25سنة نسى اللعب وعندكم من قبلنا بشوية انعدم اللعب
وحياة الغالى عندك ياشيخ ياريت بعد ألاخضر والابيض نفسنا فى واحد فوشيا يناسب الجو الحلو اللى احنا فيه ويبقى العيد فرحة كدة ويجعله عامر انشالله..

هل عاد جلعاد؟؟؟؟؟

هل عاد جلعاد ؟؟؟؟ وحياة الغالى طمنونى ياولاد أحسن صعبان عليا أمه وأبوه واهله واللى يعرفوه
أصل اللى ليه أهل يبقى ليه ضهر ويظهر والله اعلم ان الاسرى المصريين قصدى المنسيين والواضح برضه
اْ نهم مقتوليين .... ياولدااااااااه مالهومش لا أهل يسالوا عليهم ولاضهر يسندوا عليه ولاارض تلمهم
جلعاد ياولاد بتقولوا مين ؟؟؟ جلعاد خللى الكبيييييييييير
يتحرك كم حركة علشان يرجع جلعودى سالم غانم لحضن الست الوالدة بس يظهر أن والدة الاسرى المنسيين مالهاش فى ولادها خير... ولاعلى ايه النوح دى مالهاش خير فى اللى صاحيين يبقى أحسن سلمولى الحاجة أم جلعاد

عصابة القناع الاسود

عصابة القناع الاسود؟؟؟؟

من منا لم يقرأ ولو مجرد عدد من مجلة ميكى ؟ أو ميكى جيب ؟( قبل أن تطل علينا التحف الجديدة ) وبالتاكيد كل من أرتبط بشخصية معينه بطوط أو ميكى أو الجدة بطة ومع ان كل الشخصيات رائعة الا ان شخصيات عصابة

القناع الاسود كانت مميزة مع انى ماأفتكرش منهم غير .... دنجل...

مش عارفة ليه عصابة القناع الاسود شغلة بالى بقالها فترة الظاهر انها كانت من الشخصيات المحببة للكثير والواحد مش واخد باله يعنى مثلا افتح جريدة قومية حكومية ملوخية مهلبية الاقى عمك دنجل.... بيضحك أفتح قناة تلفزيونية أرضية فضائية بس المهم انها تكون برضة ملوخية الاقى العصابة أدام عنيا مش عارفة دى هواجس ولا هلاوس ولا هى العصابة فعلا وانا مش عارفة .

سؤال ياخلق الحالة اللى عندى دى مرضية ولاعرضية ولامستعصية ؟؟؟ ولا ابدية؟

سؤال تانى ياترى بتشوفو ا دنجل . زى ماأنا بشوفه ولاايه؟